Aðalfundur og rafrænt stjórnarkjör.
Aðalfundur Lífsverks lífeyrissjóðs verður haldinn að Engjateigi 9, Reykjavík, þriðjudaginn 8.apríl kl.17:00
Dagskrá:
1. Skýrsla stjórnar
2. Ársreikningur 2024 kynntur
3. Gerð grein fyrir tryggingafræðilegri úttekt
4. Gerð grein fyrir fjárfestingarstefnu
5. Greint frá úrslitum rafræns stjórnarkjörs
6. Kosning varastjórnarmanna
7. Kosning endurskoðanda og tveggja fulltrúa í endurskoðunarnefnd
8. Tillögur um breytingar á samþykktum
9. Ákvörðun um laun stjórnarmanna og endurskoðunarnefndar
10. Önnur mál
Endurskoðaðir og undirritaðir reikningar ásamt skýrslu tryggingafræðings munu liggja frammi á skrifstofu sjóðsins viku fyrir aðalfund, sjóðfélögum til sýnis.
Rafrænt stjórnarkjör fer fram dagana 31. mars - 4. apríl nk. á sjóðfélagavef á vefsvæði sjóðsins. Innskráning er með rafrænum skilríkjum eða auðkenningu í appi. Sjóðfélögum gefst einnig kostur á að greiða atkvæði á venjubundnum afgreiðslutíma á skrifstofu sjóðsins, á meðan kosning stendur yfir.
Kosið verður rafrænt um einn aðalmann í stjórn (karl eða konu), auk þess sem tveir varamenn verða kosnir á aðalfundi. Framboðsfrestur til aðalstjórnar er til 17. mars. Framboðum skal skilað til skrifstofu sjóðsins, b.t. kjörnefndar, ásamt minnst fimm og mest tíu meðmælendum úr hópi sjóðfélaga. Þeir sjóðfélagar sem hafa hug á því að bjóða sig fram eru hvattir til að hafa samband við starfsmenn sjóðsins til að koma á framfæri stuttri kynningu til birtingar á vefsvæði sjóðsins. Um hæfiskilyrði stjórnarmanna vísast til 31. gr. laga nr. 129/1997 um skyldutryggingu lífeyrisréttinda og starfsemi lífeyrissjóða.
Kjörtímabili Georgs Lúðvíkssonar í aðalstjórn lýkur í vor en fyrir liggur að hann mun ekki gefa kost á sér til áframhaldandi stjórnarsetu.
Nálgast má reglur kjörnefndar og frekari upplýsingar um stjórnarkjör hér.
Reykjavík, 19. febrúar 2025
Stjórn Lífsverks lífeyrissjóðs og kjörnefnd